Umushinjacyaha Mukuru wa Sudani, Alwaleed Sayed Ahmed, kuri uyu wa Gatandatu yatangaje ko Omar al Bashir ashobora kugezwa mu rukiko mu cyumweru gitaha ashinjwa ibyaha bya ruswa, ibi bikaba bigiye kuba nyuma y’amezi abiri Bashir ahiritswe ku butegetsi bwo kuyobora Sudani.
Ntabwo uyu mushinjacyaha mukuru yigeze atangaza umunsi nyir’izina Bashir azagezwa mu butabera, ariko yemeje ko Bashir azakukiriranwaho ibyaha bya ruswa no gutunga amafaranga y’amahanga.
Hari n’abandi bayobozi bagera kuri 41 bahoze mu butegetsi bwa Bashir bari gukorwaho iperereza ku byaha bya ruswa.
Aljazeera yatangaje ko ubushinjacyaha bwanasabye ko Bashir akorwaho iperereza ku birego byo gukoresha amafaranga mu buryo bunyuranyije n’amatege ndetse no gutera inkunga iterabwoba.
Omar Al Bashir ufite imyaka 75 yahiritswe ku butegetsi n’igisirikare muri Mata uyu mwaka wa 2019, nyuma yaje gutabwa muri yombi ajyanwa muri gereza ya Kober iri mu murwa mukuru Khartoum, akaba yari asanzwe yarashyiriweho impapuro zo gutabwa muri yombi n’urukiko mpanabyaha mpuzamahanga (ICC) akurikiranweho ibyaha bya Jenoside byakorewe mu ntara ya Darfur guhera mu mwaka wa 2003.
NIYONZIMA Theogene
